細時睇電視玩玩具的回憶

以前睇日本動畫/特撮片果陣，梗係希望心儀玩具響手，跟住電視片集一齊玩，試下睇緊太空堡壘，手頭超力電磁俠五架超合金在手(冇乜可能，印象中好似賣兩舊幾水一套，講緊四十年前喎，人人都話依家靂住D錢回到過去就好咯，發下夢都重得。)

細個睇鐵甲萬能俠，朋友號摺埋對翼同機械人結合，我就搵MAT螺旋運輸機較飛，一野part斷對翼，弱智到無倫！

超人歷險記有一集一號機剷左落海，我就將架模型撞落水冷樽裝汽水機度玩，D水整污糟邊個換水？

又試過搵火柴燒著一號機玩爆炸，俾阿媽打到飛起！

屋企有齊架撐做超人歷險記，有齊三架戰機模型，老翻膠超人阿鄉，怪獸一隻，重有其他超人軟膠，以超人父母最有印象。

廿多年前響香港搞嘅玩具展見返其中幾架模型，家陣響玩具群組睇返晒。

麗的播超力神勇俠果期，係去人鋪頭搞搞震先知道有得睇，手頭上無超人，就借人地蜘蛛俠公仔當係，最記得有一次，有本超人書仔舉辦送蜘蛛俠公仔遊戲，嗱嗱聲填表參加，結果梗係落選啦，反而鄰居有人送左個蜘蛛俠俾佢。

當年無敵飛天俠播映，同鄰居細路玩先夾埋四個機械人，我出電極號，有次借俾人玩，紅色頂帽跌左落坑渠搵唔返。

#MAT