網民●記趣

做左網民十幾年，起碼申請過三五七個電郵帳戶配合唔同需要：登錄幾個網上討論區，化身唔同身份出現留言，由於有d區域設有會員制，要登入有留言回覆兼儲分，有d帖要你儲夠一定分數先有資格參與其中；申請網上拍賣要兩個戶口，「黑面果個」用黎響競投過程中「浪」價，作為賣家可能有件野唔捨得賣於是搵另一個戶口拉高價錢趕絕其他競爭者，同時亦可作假買賣互俾評語之用。 

...繼續閱讀

檔主曾經擁有三個hotmail，四個雅虎戶口，用黎軟件登記啟動之用，到面書開始流行，整幾個隱形戶口以備不時之需，家陣好多網站都歡迎以面書戶口登入，認真方便，交換條件極可能係作為商戶宣傳推銷之用，唔想真正戶口被賣豬仔？用空殼戶口登入，藉以避開個人私隱或通訊錄被廣告入侵。 

呢d咁嘅行為其實有d自欺欺人，在網路上睇過咩做過乜，老早有cookies記錄在案，例如用面書同時上youtube睇片，睇過d乜，下次網商會推薦你可能會有興趣睇嘅內容。 

一向有把戶口資料密碼記錄在file，近日發現唔小心將舊檔冚新檔，大穫！好在有d野有寫低落紙度，但係都有d戶口已經用唔返，hotmail最為嚴格，要多重網路認證，之前寫低果d pw 已經失效，恃住有file記住，改到烏哩單刀，最衰已經唔係好記得果條安全提問係乜？

最有趣經歷係多年前其中一個戶口曾經收過一封電郵，內容係某學院機構分享會員活動情況，甚至係一d私人聚會邀請，檔主估計「真正」收件者正係法律學者張某某，唔知點解咁橋有人將我虛構人名嘅電郵戶口登記到機構通訊錄之中，而我一直收到呢d奇怪電郵咁衰又無即時覆佢，話俾佢知send錯啦老友，於是半自私地偷睇人地私隱，好啦家陣無得睇咯。