新聞報導●充滿幻想嘅玩味

對住枱面一疊紙，忽然諗起以前睇電視新聞報告，報導員每講完一段新聞，就必定隨手攞開張稿，接住又報另一單，但佢對眼永遠望住鏡頭，又唔使對住D稿讀嘅？後來先知佢前面攝影機附近有個mon打出內容提水，俾佢跟住照讀，做法真係幾聰明，一定係從外國電視台學呢招。

...繼續閱讀

聽電台報新聞交通，只有聲音令人充滿聯想，到底個主播係乜頭乜路乜野樣呢？把聲好聽真人就嚇你一驚？有D人報新聞十足講急口令咁，最驚佢食字跳掣唔知點咁！有D照住份稿讀都可以讀到甩甩咳咳，真係服左佢，眼口如此不協調，質素水平大大下降，咁算點呀？作為聽眾要忍受下囉！人地返通宵更架，佢唔做邊個肯做？

靚ken個陣冇野好玩，搵D唔要嘅功課簿，逐頁撕開，除左攞去摺飛機之外，就係扮下報新聞，坐響店舖櫃檯亂噏一輪，阿爺都話我「抺爛布」。

事關我同隔離鄰舍D細路仔大部份時間留響舖頭度好少機會出街，人地禮拜日多數關門休息，咁啱D大人出左街，就響人家地頭玩，通常屋邨樓下舖頭屬於前舖後居，舖尾有個木造搭成嘅閣仔，會用黎放下雜物或者床鋪，擒下度木梯上去就當係潛水艇個瞭望台，話出海面偵察下，當然要充滿豐富嘅幻想力先得，玩下水槍當攻擊怪物之類，通常搵D目標亂射！又同D女仔朋友玩煮飯仔呀，依家叫「角色扮演」果D遊戲，大家份屬夫婦關係，佢細佬扮做我個仔呀之類，係幾咁天真無邪。

鄰居係開針織廠，執起個線碌筒套落手度扮三一萬能俠電鑽，真係無野好玩。

有次去人地舖頭度玩，貪心，好老實不客氣咁沖左杯好濃嘅咖啡飲，個晚完全瞓唔到，抵呀！

唔同年代嘅小朋友都有玩過呢種玩意，特別係D大人開舖做生意嘅日子，求其搵個紙箱玩餐飽！試過用黎玩碌斜坡添。