有一種觀影經驗叫...by 鄭丹瑞

...繼續閱讀

「有無發覺，比起我哋後生時，依家啲電影同電影院係多咗，但係可供選擇嘅好睇電影，就少咗。」損友甲是電影發燒友：「上個禮拜，我偷得浮生，諗住搵場戲睇下，點知揀唔落手。我細個嘅時候，努力幫人補習，儲埋啲錢就係去睇戲，一到星期六，由十二點半、兩點半、五點半、 七點半，睇到九點半，甚至午夜場都殺埋！而且套套都係好戲，都有嘢學，有嘢袋到落袋！」

「我細路仔嘅時候，住木屋區，家徒四壁， 睇戲係一件好奢侈嘅事，但係我又鬼咁鍾意睇戲。」損友乙插嘴：「辛辛苦苦儲埋成個禮拜嘅食飯錢，先至夠去睇一套戲，嗰陣時未發明 DVD，如果好睇到想睇多次，我就匿埋喺戲院嘅洗手間，等下一場開場，戲院大堂一熄燈， 我就偷偷地走番入去，再睇一次、兩次，甚至三次！所以，後來啲電視經典頻道成日重播好 多經典西片，我合埋雙眼，淨係聽對白，已經知道係邊套戲、邊個導演、邊個主演！唔似依家啲戲，喺戲院睇完，隔一排喺電視度再睇番， 竟然完全唔記得晒啲劇情，好似從來未睇過咁， 一啲印象都無！」損友乙口中「好似從來未睇過」的觀影經驗，一眾損友紛紛認同。

「電影嘅技術進步一日千里，但係真係能夠打動人心，真係可以永遠俾人記住嘅電影， 就愈嚟愈少。」是電影前輩行家的慨歎。

鄭丹瑞

===

文章末段說「好似從來未睇過」的觀影經驗，非常認同，或者電影再沒有金句對白出現，又或者網絡年代資訊太多令大家索性變成金魚記憶了。