四哥？四哥！

檔主第一份工響快餐店打工，碌齡、打檯波都係果時開始，自問冇乜運動細胞，學極都唔曉，果時D同事嗌我四哥，即係四眼哥哥嘅簡稱咁解，係工作間一種易記代號，俾人稱呼阿哥，點都有少少貶義，不過作為新丁要入鄉隨俗，好在自己工作總算上手，成為圍威喂其中一份子，果時又學到一個新穎動作詞，渣水，哈，原來係咁解！唔知都唔好問，我諗今時今日冇乜人咁講啦卦。(另有內容詳見「第一份工作」。)

...繼續閱讀

至於真正稱得上四哥，我諗係謝賢先生至有咁嘅資格，由此諗起幾十年前大台電視劇天虹，汪阿姐唱主題曲果套呀，劇情當然唔會記得，五個字形容自己：正宗小學雞，有卡通同劇集揀，梗係睇卡通啦。

記得四哥演嘅角色響劇入面戴果副眼鏡，就唔係好連戲，係就係一副普通有框眼鏡，有時係A款，有時係B款，唔知點解小學雞會留意呢D野，有段時間好倖自己四眼，因為覺得基斯杜化里夫未變身超人時候，戴眼鏡十分有型，試過黐線到執街邊人地掉嘅眼鏡戴，俾家人鬧到飛起，後來到升中一嘅暑假，如願以償要配眼鏡。

而家覺得戴眼鏡係一種負累，老花望野好似咸濕伯父副眼鏡咁SIR左落黎，真曲街。

Picsart下的超人15

與片集場景合成的情景

...繼續閱讀

記錄自己搞過嘅玩具特撮囉！