小學雞年代玩過的超合金

所有圖片都是網圖，本文亦是一次像老夫子合訂本結集一起刊登，通常事情回憶都是歷久常新，說完又說。

電極號的故事在此說過沒有？又在這裡重覆一次！

當年只買了電極號，但鄰居有買其他款，印象中可以有四條友仔一齊玩！(三號機好難搵喎...有冇記錯？)

電極號「頂帽」係磁石位，攝落頭殼度，唔似卡通咁打開面罩咁合体，都唔知典解D玩具係要射飛拳、飛彈，通常唔見居多，機械人玩到殘，借俾人玩，條友仔叫華強，姓乜唔記得囉！佢整跌左「頂帽」落坑渠執唔番，又係一次童年陰影，以後咪旨意借野俾人...

而家睇番呢個合金，好玩之處就係好似動畫一樣結合，打開塊面，防風好易玩到甩，黑色飛彈唔知射左去邊，前輪可以收起，頭像頂部可入銀仔當儲蓄。

此太寶郎玩具好玩之處是背後上鏈發射車葉飛輪狀物體，車葉飛上差不多到天花板左右，玩得多發條也弄壞，很少玩具能夠保存至今，只有之前在此分享過的「陰陽電磁俠」，距今足有四十年歷史。

但是歷史是不斷重覆的，八十年代在不知情的情況下借給隔離屋細路玩，回來時斷了手，發射飛拳位爛開，當堂肉赤非常，無奈又無奈，命運無法變改，於是送了給住屋邨的舊街坊收藏，但沒有送埋「武器配件」，幾十年後仍然記得果一次。

當時沒想過有維修這回事，網絡偶然見爛合金零件出售，算了吧。

充滿回憶，曾經擁有之物，雷達給人弄斷，本身也是機關掣來的，一按黄色車頭彈開，都有起碼四十年以上歷史了。

還有這件不知名超人的電單車合金玩具，大細版都買過。

無敵鋼人泰坦3的出現，已是無野好買的年代。