據理力爭

又要講D無謂野抬高下自己，話說唔知中一定中二，轉堂期間過位傾計之類，其實好似係有過位但無傾計，俾miss發現，自己黑口黑面竟然否認有過位傾計，miss好激動咁話：你響屋企可以發少爺仔脾氣，返到學校就唔可以用咁嘅態度做人！(真係好笑屈得就屈)

哈！到家陣自己幾十歲人一樣據理力爭，諗到就衝口而出，(明明係對方搵人笨柒，唔通唔串返佢呀？)所以整定自己無乜運行，連做人虛偽D都懶，極唔適合做服務行業，亦都好在唔係響私人機構度打工，咁嘅款俾人炒卵左九世啦！試問自尊心又值幾多錢一兩吖今時今日？

有口痕友話過：試下俾我十萬八萬一個月人工吖，俾人鬧又有乜所謂？人工包埋吖嗎！

哈！你睇果班唔問責嘅卵樣膠官，每次衰卵左咪又係厚住面皮返工，鬧得走至出奇？同D錢作對咩？響記者會鳩噏幾句又鬆人，面不紅耳不赤係咁被人鬧喎！

睇班阿傻好似智障咁，唔知乜唔知物兼且大話連篇咁又過骨，三角眼大嬸擺明線佢地一鑊，搞咩開誠佈公，實則愛黎出醜！

自作聰明

話說上個月到電訊公司更換sim咭，店員收取若干費用，老想是為那低用量太空咭增值吧？今早飲茶致電聯絡之際，聽到voice message 說著：「閣下儲值咭已經到期不能使用，為保留號碼請你增值再使用啦。」

吓？已不是第一次換咭，老媽手機被偷，由老爺機換弱智能電話，都是在下親自辦理換咭手續，照樣付款增值呀。

回家看看那保留了的收據，上面印著：更換聰明咭收費？大安旨意那五草是增值費用，別笑，檔主不上台，因為用量少，當有免費wi-fi時才使用手機，增值只為了打電話時扣除使用的，況且亦少在街上迷頭迷腦上網，現在手機通話好像兩毫子一分鐘，基本上很少通話，只作不時之需，正所謂百貨應百客，有何不可？

這種天時懶得去商店理論，只怪自己做人太自以為是，猜想店員解釋服務費和增值費是兩回事，損失只是幾十塊錢，算吧。

D野要俾錢買架

電器？識條鐵咩？幾年前買左部號稱平板手機，八舊水找一蚊，用過先知係乜料，求其上到網就算，無用一排，部機唔著，以為報銷，叉叉下電又著得返，不過唔曉熄機，似乎個掣壞Q左，唯有用顯示>休眠方法令佢熄機，要用佢就要插一插叉電幾秒，咁佢先識得著返。

講到咁複雜，都係響屋企用嘅啫，個皮套自然損耗，邊皮位甩晒線咁滯，上到面書、睇下突點姑娘就算，速度？要睇寬頻提供，唔覺快左幾多，貪個畫面夠大。

屋企夾埋有幾個手機要叉電，又懶買多頭叉座，其實兩排拖蘇都夠用吖！近來發現有條USB線叉唔到電，又係懶去研究因由，今日靂去工作間試試，哦！唔關拖蘇事，係USB插頭接駁器彎臣左，無電到！就咁用條線駁電腦係通嘅，好在無聽人講丟左佢，D野要俾錢買架，除非爛左斷左無計，否則用到盡先合乎環保原則囉！

「師弟出馬」

昨晚看成龍主演「師弟出馬」，印象中第一套在戲院看的電影，好像是賀歲片吧？那個年代只有新年才有機會和家人一起進戲院看戲。這一個晚上拋開現實，加上非常強烈情意結關係再看，這麼多年後才看得明劇情(一笑)，小學雞哪懂得有辱師門，被人利用，錯摸笑料，不過印象中有幾個位是記憶猶新的，當年看完戲在家說(唱)了幾天(娘精行為)：無問題，污糟邋遢無問題(當年洗衣粉廣告歌的影響力吧？套用在電影情節之中)，另一個位是成龍跌落浮泥堆唱有隻雀仔跌落水，和李麗麗裙擺功夫對打個幕，証明自己記性還可以。

影片畫面經過數碼化改善後已沒有年月痕跡，只能從演員髮型分辨年代。

最意外發現片中有元彪出場，當年看韋白大師兄的聲音已知是岳史迪(馮錦倫)把聲，那個年代電視配音員秘撈十分普遍，田師父聲音是演員吳桐配音，石堅叔如果親自配音更佳。

片中都自爆受電視劇貼錯門神的對白影響，片尾打大佬惡棍有點拖時間的感覺，以弱勝強有點反諷意味，代價真大。

回塑六十年代中期電視台吸納一班粵語片明星做幕後配音工作，同時有機會在劇集演出，電視算是當時新興行業，廣納話劇界人才加盟，後來更開設藝訓班，培養不少台前幕後精英，製作方針不斷摸索和創新，打好吸引觀眾基礎。