一代畫匠玩偶象
畫評、攝影：契弟
內文電子化：在下
連續幾個禮拜，我哋收到各大門派FANS投訴話我哋玩轉名人圈將啲藝人玩得好過份，其實我哋不過係末學後進，有三個人玩明星玩咗幾呀年，仲係當街當巷明目張膽嗰隻，佢哋就係三大畫派代表人物，承先啟後一代巨匠。今次本欄就實地報導佢哋點樣將啲明星蹂躪。至於佢哋玩人背後嘅辛酸亦會一一披露。
連續幾個禮拜，我哋收到各大門派FANS投訴話我哋玩轉名人圈將啲藝人玩得好過份，其實我哋不過係末學後進，有三個人玩明星玩咗幾呀年，仲係當街當巷明目張膽嗰隻，佢哋就係三大畫派代表人物，承先啟後一代巨匠。今次本欄就實地報導佢哋點樣將啲明星蹂躪。至於佢哋玩人背後嘅辛酸亦會一一披露。
Monet De Lamor
個人小傳：Lamor先生原為印象派大師莫奈第18代傳人， 一生追求至高無上嘅寫畫境界，於80年以60歲高齡取得大 「粒」藝術學院廿年制博士學位。之後幾經鑽研創出一套名為超虛擬現實後印象變化渦輪增壓效果，使其畫風外剛內柔近看又似夢非夢，簡直令人如丈八金剛，七孔流血。
你千祈咪問佢畫緊邊個，因為你會好Hurt一個想畫梁家輝同張國榮，但係又畫咗兩個傻仔嘅藝術創作人。
經過超虛擬現實後印象變化渦輪增壓效果嘅劉青雲，係咪好襯個戲名呢。
喺呢張作品上面，你 一定會奇怪明明寫住劉德華同袁詠儀，但係點解會變咗爾冬陞同周海媚嘅？
剛柔流浮世上段蒙古派
健明太郎(TUKO MOMO TARO)
個人小傳：一個二十三歲輕度弱智嘅日本人。自小已好學非常，但礙於智力有限往往問非所求。早年來港定居隨書法大師曾灶財學得一手好字。太郎於一次街頭塗鴉時被藝評家發掘，創出剛柔流浮世上段蒙古派成為一時佳話。其畫風筆走龍蛇，穿洲過省，對於人形面相永遠矇糊不清雌雄莫辨。
呢張太郎先生作品充份地表現出其畫派畫嘢唔知似乜嘅風格。
希望鄧一君同盧愛倫唔好期望咁大啦，求其五官排位正確就算執身彩囉。
太郎先生仲有一種特異功能，可以將鄭伊健、西城秀樹、劉德華、蔡楓樺、吉田榮作、後生華英雄同埋譚炳文集合一身，成為呢張作品。
普普現代嶺南派
流向西
個人小傳：
向西先生為90年代畫壇新晉，有冷血畫神之稱，人物描寫往往面無人色如屍體一般。大走意外、死亡路線。代表作有：軒尼詩道黃格仔同埋大老山隧道雙白線。
向西先生話原本佢係畫緊吳倩蓮嘅，但係唔知點解畫下畫下就畫咗梁朝偉出嚟，你哋睇吓阿Tony幾愕然！
當向西先生完成咗呢張作品嘅時候，佢先發覺將吳倩蓮畫錯咗做高麗虹。
最後，喺禽獸導演嘅威迫下，向西先生終於畫得似模似樣，仲據聞佢畫通緝犯嘅技巧亦得到 治安當局賞識，打算重金招攬云云...。
最後，喺禽獸導演嘅威迫下，向西先生終於畫得似模似樣，仲據聞佢畫通緝犯嘅技巧亦得到 治安當局賞識，打算重金招攬云云...。
==內文完==
