脫坑啦！重買？

呢度係一個想當年嘅網誌，自不然講下舊屎。

...繼續閱讀

發覺時間線去到呢度，有儲開野嘅人會開始脫坑，唔係典解三十幾年前「德發」已經有懷舊店賣下老餅野，順便清緊D收藏，聽講盧生有份開嘅，後黎佢都好似響尖沙咀開左間賣漫畫嘅專門店，輾轉間去左信和，家陣響荔枝角開鋪。另外有人響太子開電影收藏精品店；有D人又會將珍藏搬去寄賣，某著名店舖越來越擠迫，幾乎乜都有得賣咁款；網拍呀面書買賣平台越來越多雜奔冷野賣，希望大家貨如輪轉。

今日又見有玩具展出現，一連三日又係D2果度，玩具店/收藏家又係時候清緊D野，相信自己都唔會去捧場，得閒都諗下第二輪清野啦，好羨慕人地通屋玩具？咪講笑啦！幾十歲人做番一D切合年齡嘅野，重同人迫咩？阿叔咪阻住條路行好喎！XDD

到底有無一個主題商場係有年齡限制？最好有個地方只準中坑去，D野唔使周圍搵，可以玩以物易物，咁就好咯，(記得有次響德發以書換書加少少錢換左幾本餓男黑封面版，正！)店員好熱情咁招呼你，唔會十問九唔應咁，發夢都可以有嘅。