街邊小食

...繼續閱讀

...繼續閱讀

以前住公屋或者蒲紅磡廣場果陣，都會食下呢D小食，我個年代屋邨檔口邊有用發泡膠外賣碗食㗎！想買外賣要自備碗碟器皿，D檔主直頭用飯碗裝翅同魚肉，D客食完要預備筒水洗碗再用，架木頭車裝有個氣爐，上面放個金屬面盤做煲(見下圖)，咁就係咁滾住煲嘢，當時檔嘢本身係間舖頭，前面擺張帆布架起個車仔檔，當正擴充營業咁款，朝早就賣粥，放學時段就賣碗仔翅、魚肉之類呀，響冬天食風味十足。

舊屋邨年代已見梗檔用呢種木頭車+火爐+面盆=搵食工具賣碗仔翅，佢地真係有落肉絲架，風味好過齋翅，食果陣記得加返D麻油 。

後尾幫襯多左，大家又係舖頭街坊，同個太子爺熟絡左，俾左包統一上湯伊麵調味料佢落煲翅度，搞勻左唔多覺，仲好食左添！

以前D人俾錢好興扇手跌左個大餅落去，佢都執唔少，正所謂眼不見為乾淨，煲野食落又唔覺有咩問題吖，正所謂大菌食細菌 。自己亦心思思試過響屋企整碗仔翅，豆粉+豉油+水，煲滾食又唔怕肚痀。

至於生菜魚肉，見住老闆用刀削魚肉落D滾湯度，佢手上嘅碟係咁一路刮一路轉，即場表現功架，重有一樣野值得懷念，就係豬油渣麵，屋邨車仔檔有得食，但係當時我係唔知呢D係豬油渣嚟，俾錢買野食，求其有碗湯麵之類，果陣典識分乜嘢上海麵吖，食嘢最緊要方便就手，吉串一毫子魚蛋，用電話簿紙包嘅紅雞腳，五毫子食到嘅車仔麵，都令我回味無窮，小學雞已經很開心，滿足當時嘅感覺，夏天去士多飲水喉水西瓜汁，街邊檔紅豆冰、菠蘿冰、蛋殼啫喱、潛野玩，冇野好食就買粒話梅、豬肉鬆呀，越講越停唔到口。

家陣已無幫襯呢類食店囉，肚餓寧願去食碗魚蛋麵，有得坐好過企街咁戇居。(以上都是網圖)

縱使如此，相信只有辦公室食堂每年聖誕派對出現的咖哩魚蛋/豬皮/生菜魚肉最似樣，百分百還原街邊風味。

這張在澳門街頭拍的雞蛋仔檔攤照片。

#街頭小食  #街邊小食