雜誌『壹本便利』漫畫專題：寺沢武一●香港多媒睇 (圖片修訂版)

...繼續閱讀

前言：自問不是甚麼範疇的粉絲，只看過寺沢先生作品「哥普拉」而已，更沒想過因為這樣理由才把雜誌內文電子化，為記念老師，連忙行動。

訪問刊於1997年4月左右。

撰文：周文

電子化：在下

=======

《哥普拉》的作者寺沢武一重臨香江，上次來港已是三年多前的事。世界上有兩件事改變了寺沢的一生，第一是他自小鐘情的漫畫；第二是十三年前開始接觸的電腦。今次來港並非為宣傳新作，而係慶祝入行20週年兼講解他每年投資近二千萬日圓的多媒體漫畫點巴閉。

目標人物

記： 「為何會設計遊戲game？」

寺：「因為我以前一直都好鍾意玩game，依家我就同PlayStation設計緊一個叫《電子出版》嘅game。」原來寺沢都有玩他媽哥治，不過訪問當日留咗喺酒店， 「哈！可能依家死咗都唔奇！」

記：「手頭上有甚麼工作？」

寺：「依家我主力畫緊《哥普拉》嘅遊戲機3DO版，可能會搵外國公司合作出版。」目前寺沢每日平均工作10小時，每10日休息1日。

1955年3月3日在日本北海道出生，後來因投稿得獎而晉身漫畫界。1976年拜手塚治虫為師，1977年在《少年Jump》推出《哥普拉》名揚宇內，連載達七年之久！

記：「你的電腦知識從何而來？」

寺：「十三年前我開始用電腦畫漫畫，嗰陣日本仍未流行電腦，所有知識都係自己睇書學嘅，甚至啲software都要由自己設計添！」寺沢的第一部電腦是NEC PC9801，當時設備十分昂貴，每年要投資約港幣$150萬！

記：「你畫漫畫有冇最終目標？」

寺：「有，我想將漫畫表達嘅媒介擴闊，進入多媒體世界！」

寺沢目前所有作品均以電腦製作，最新作是在internet上連載的《On Line Comic蝙蝠女王》。

記：「你覺唔覺得哥普拉似成龍？」

寺：「Jacky Chan？係喎！不過《哥普拉》係20年前嘅作品，當時成龍都唔係咁嘅樣，個鼻都冇咁大啦！」

記：「有乜嘢可以勸勉一下香港嘅後輩？」

寺：「一定要對漫畫有夢想，有抱負，有嘢想表達先好入行，因為做漫畫家係非常辛苦㗎！」

記：「點解你筆下嘅女性都咁Sexy？」

寺：「………唔，男仔基本上都係鍾意睇呢啲，漫畫應該係以身段嘅線條美嚟劃分男女角色嘅。」告訴大家一個秘密，寺沢已經結咗婚。問佢重有冇其他情人，佢話：「有可能㗎！」

來港行動一

天寒地凍冇偈傾

3月27日朝早陰風陣陣有點凍，眾記者同寺沢齊坐花車遊香港，由觀塘「文傳」總部出發。大會安排咗三位金髮女郎陪坐宣傳，但寺沢就似乎同佢哋冇乜兩句，可能言語不通啩。

路過「黃金」而不入

悶悶地坐到12點幾，終於到達目的地深水埗「黃金商場」。原先記者以為大會為配合主題所以「車」寺沢嚟行吓電腦商場，點知佢喺福榮街一帶兜兩兜揮揮手，講咗句「沙唷啦娜」就連隨搭的士去食飯，奇奇怪怪有啲唔知為乜？

行動二

美女穿梭寺沢世界

29日上晝九點幾，一連兩日嘅戲肉「寺沢武一漫畫及多媒體世界」正式喺「Sogo」21樓開幕嘞。三位有份坐花車嘅金髮美女搖身一變，以寺沢筆下嘅性感女郎扮相出現，成為全場焦點！其中尤以扮演《武》女主角的紅衣女郎最維肖維妙。

兩日前冇乜兩句，今日寺沢對住打扮性感嘅靚女就變得談笑風生，正所謂人逢喜事精神爽嘛。

2日簽名600個

每日大會都招待近百名漫畫迷排隊輪籌攞簽名，每人限簽三個，2日即係簽咗成600個名！寺沢認真好人。

慈善拍賣贈「Andy」

大會準備咗5幅寺沢親筆簽名嘅「電腦原畫」公開競投，每幅底價$500。雖然「原畫」係可以用電腦大量複製，但競投情況仍相當熱烈。最後連同其他簽名精品一共籌得$15000，而左圖幅畫更以最高價$5200成交！善款撥捐「劉德華慈善基金」。

《武》game俾你玩場內特設五部電腦，run由寺沢親手設計嘅《武》RPG game，從旁重有工作人員講解(因為係日文game)，你睇呢位仁兄玩得幾投入。

送寺沢親筆畫

《便利》今期送你寺沢武一嘅親筆畫版2大張！另加「文傳」送嘅5本簽名《哥普拉》漫畫！快啲剪低印花，連同姓名、年齡、地址、電話、身分證號碼貼晒喺信封底，寄長沙灣郵箱80305號《便利》漫畫組抽獎啦！

第269期 壹本便利