記得2003年8月，星仔正在上海拍攝《功夫》，有周刊報道他住的酒店房間，半夜走出髮廊妹，之後星仔曾解釋該女子是一起住套房的編劇曾謹昌的友人，而自己一概不知情。新聞見街當日，朝早10點與星仔通電話，他為了此事好生氣，問我：「你信唔信我會做啲咁嘅事，我使唔使去搵髮廊妹呀！呢件事同我無關，你信唔信我呀？」當時還未睡醒的我回他：「我又唔喺現場，單新聞又唔係我做，點知呀！好眼瞓！遲啲再傾啦！」星仔依然不停說：「咁你識我咁耐，覺得我會唔會做呢啲事呀？」回他：「真係唔知喎！你對感情事一向都係神神秘秘！畀我瞓啦！」星仔：「而家我都嬲到瞓唔着，你唔話信我，你都冇得瞓，我唔會收線！」與他在電話中糾纏了10幾分鐘，我說：「唔講啦！」然後我都不理他，把電話掛線了。後來他為此新聞，曾狀告周刊，最後星仔接受和解獲巨額賠償。
講起他的奇怪思維，記得有次我人在台灣，李修賢出席活動時，以老師的語氣叫記者轉告周星馳：「做人要厚道，錢不是萬能，朋友始終最寶貴。」新聞見街後，我收到星仔打來電話，他說：「你做乜咁樣寫我？係咪你搵佢出嚟話我？」我一頭霧水說：「我都唔知乜事，我喺台灣喎！你係咪太睇得起我呀！可以叫到李修賢出嚟話你，仲有我有乜動機要做呢件事呢？」之後星仔就收線。又有次凌晨4點，收到他來電是嚇一嚇，以為有甚麼緊要事：「嘩！做乜咁夜打來？」星仔：「吓！好夜咩！幾點呀？我喺L.A.，呢邊係下晝，你瞓咗未呀？有嘢想問你……」原來是閒話家常。
又有一次，他去台灣商演，要留宿一宵，我和幾個行家去採訪，與他同住一間酒店，晚上他叫我們上其房間聊天，在房中他說：「傾到我瞓咗，你哋就自己走，唔使熄燈！」原來他是怕黑，平時出國都會找助手或工作人員同房睡，不過這次沒有助手同來，當晚只聊了約15分鐘，突然他房裏的電話響起，他接聽之後，不一會就說倦了想睡，叫我們閃人。雖然奇怪不知他搞甚麼，但我們當然聽話離開了，後來等電梯上房，當電梯門一開，竟然見到一位很紅的台灣女星在電梯內出現，這酒店真是星光熠熠。
跟他合作過的人如李修賢、王晶、杜琪峯、向華強太太、李力持、洪金寶、吳孟達、高志森和林小明等都對他有意見。也許與他拍戲時的認真和執着有關，他習慣堅持自己的主張，好多細節上與合作夥會出現分歧，如果對方不讓步就好容易反面收場。有幾次去到片場探班，見他與王晶在現場爭論劇本，一般都是王晶投降，依照他意見去拍攝。當時他已是票房靈藥，票房號召力與成龍、周潤發並駕齊驅，三人更被喻為「雙周一成」，大家開始叫他「星爺」。
升格星爺做導演後，在拍攝現場，人變得更有自信，幾乎是唯我獨專，當時坊間傳出他與動作指導洪金寶（三毛）拍這戲期間出現好多矛盾，後來三毛就黯然離開戲組。當時三毛私底下已和很多公司說過，不想與星仔再合作，但世界是圓的，約一年過後，有晚我與某紅男影星約了幾位朋友在半島酒店的The Bar餐廳聊天，剛巧遇見星仔與三毛坐在一起，見到三毛同星仔傾了不夠一個小時就先行離開，之後星仔用電話whatapp我：「過來傾吓！」我坐下來就問他：「你同三毛唔係傳不和咩！做乜你會約佢？」當時他說：「傾吓偈啫！冇乜特別！」我說：「信你至奇！」後來據我所了解，星爺是有部新戲想搵三毛做動作指導，所以主動約三毛出來，但當然沒有下文啦！
記得好幾年前，《蘋果》列了一個巨星片酬排行榜，星仔片酬在某女星之後，新聞見報後，他又打來投訴：「有冇搞錯，話我片酬仲低過佢！你知唔知有外國公司出過乜價搵我拍戲，不過我推咗冇接咋！」我說：「冇接到就唔算係啦！你係咪肯公開回應呀？」他卻說：「咁我又唔會公開回應喎！其實你真係對我唔好，冇當過我係朋友。」我回他：「星仔唔好玩啦！你點會當傳媒係朋友呀！我覺得你都唔需要朋友嘅！」曾經有跟他合作過的電影人告訴我，說星仔不知是否真的沒太多朋友還是工作狂，大年初一、二、三這些大節日，都會找人一起開工做後期或開會，他自己不過節，也不考慮人家要不要和家人朋友過節，但因為他是星爺，不少製作人都欣賞他的才華，所以他一聲號召，大家都願意放下家人與他一起開工，這也是他在電影世界擁有的魅力。
白露眉
沒有留言:
發佈留言