十五二十的回憶

話說當年會考放榜過後，終日無所事事，老媽子d雀友介紹左份工俾我，而檔主第一份工， 就係響某快餐店度做，之前都未試過打工，暑期工都係幫屋企手，送下貨跟頭跟尾，歷住張單收票呀，重要係無糧出果隻， 咁都得？

(網圖)

間快餐店叫做超X， 又名X群， 以前都未聽過超X有快餐店， 只知有麵包分店， 響黃竹坑邨公園食物亭開店， 間鋪一邊售賣麵包蛋糕， 一邊屬於快餐部， 附近有間出名既中學， 好多美女學生黎買野食架，重記得第一日開工，要著果套好核突既白色制服，條褲重要係吊腳既，腳踏黑布鞋，檔主重好蠢咁問左一句：可唔可以唔著(呢套衫)呀？

笠埋頂紙帽更加似科學怪人，可惜果時無影低相留念，懶咁瀟灑。

初黎步到，樣樣野都好新奇新鮮，第一日係負責煎早餐俾人，即係雙蛋火腿之類 ，論盡到將d膠碟放左響個電爐側邊，差d燒黑晒。

但係練到單手打蛋技術，已經好叻囉。

午晚飯市就做煎牛排豬排之類野，平時就襯燒焟佬出去渣水行開左就去打貓。

返工無幾耐， 發現左一個同阿翁(美玲小姐)甚為相似既收銀美女， 短髮，某個角度又有d似陳敏兒，依？呢個世界竟然有人可以咁似，可惜名花有主， 檔主當時係傻仔一名， 同依家傻佬係有些少分別， 當時始終個樣後生d...

咁就咁多年囉， 響街撞番d舊同事都未必認得番， 最開心最青春無敵都係果陣， 光陰快似穿梭機， 非常懷念當時日子，第一次打枱波啦、碌齡啦、通宵燒野食啦..

響呢度好多謝當年d同事咁俾面，唔嫌檔主笨手笨腳，阿威、阿添、佢細佬雄仔成個阿差咁款、嫻姐、唐詩敏呀.....有d唔記得名啦，請勿見怪。

最可笑係當年又暗戀一個收銀小姐， 佢個名好似叫Angel， 戴大框眼鏡壓偏鼻咁款， 每次坐響度食飯都掗開對腳走晒光， 睇到我噴晒鼻血， 結果佢拒絕左樣衰嘅我， 我竟然因為失戀而唔返工， 要攪到老細(二廚志哥)打電話黎鬧醒我， 哈哈， 實在太可笑， 年少無聊和無知， 只差一線， 諗番起都噴晒飯...

哈哈哈....請大家珍惜少年十五二十時~~

#黃竹坑邨