月高士多及其他瑣碎事 (修訂版)

先來分享九十年代雜誌的介紹，原文如下：(廿年前的scanner像素很低，見諒。)

懷舊士多賣「也媽霞」牧童笛？

最近越嚟越多人四出找尋一啲舊式舖頭，希望可以發掘啲倉底貨嚟收藏炒賣。最近我就喺太子附近發現一間月高士多有唔少好舊嘅小玩意，好值得留意。

月高士多屬於香港早期七十年代老舖，集士多同文具店於一身，文具當中大部分以毛筆為主，小玩意就有唔少以前嘅棋類遊戲。舖頭另一特色係用毛筆寫明每件貨名同價錢，例如Yamaha牧童笛寫為「也媽霞」，非常有趣；仲有啲而家好少見嘅陞官圖。店主說舖頭快結束營業，所以入貨請趁早。

舊士多有寶

大白兔鞋油、小巴棋、流星波板及眼鏡圈朱古力，現在即使有錢，亦很難買得到。不過，太子道一間小士多，卻擁有更多更舊更齊的貨品，也許在國貨公司也找不到。

二十年不變

店主劉伯說：「唔係我唔想轉賣新嘢，不過唔在行，咪照賣番舊嘢囉！差唔多二十幾年，賣啲嘢都係差唔多。」原來或多或少，這些貨品偶然被經過的路人發現垂青，劉伯才得以勉強經營。

最好賣是什麼？「舊泳鏡、筆盒同舊玩具囉， 啲嘢都俾人買晒，已經無貨入。」難怪劉伯視這些商品的批發為商業秘密，不願透露，因為現在已很難找得到。雖然說是「無乜點賺」，但劉伯都希望 「開到幾耐咪幾耐囉」！只因平時難買得的貨品，都大可在這「舊物超級市場」，找得到。

這裡賣的貨品，除了可口可樂和紅雙喜香煙外，相信要回到大家還是「細路哥」的時候，才能買得到。

以清代官職為背景的陞官圖，以擲骰決定功過鏞才良贓。問你知唔知「布政司照磨」是什麼？(唔係陳方安生喎。)真係分分鐘俾佢玩轉頭。

廿多年前的價目表。

===文章完===

記得响旺角月高士多買過水槍同埋手動鉛筆刨機，因為店主手寫單據太有趣，當年因為讀左壹本便利其中一期介紹，所以專程光顧呢間老店。

後尾工作間見有人掉左個同類型刨機，筆芯卡左响入面就當壞左丟棄，天呀，你唔曉整返佢出黎嘅？結果呢個刨機當成「垃圾」放响屋企，而新買果個當快閃捐贈出去囉。

咁講唔代表自己偉大，而係今日兒童節，分享一個小故事，做人懶有原則，回味昔日點滴。

那手寫單據用上花碼字，字體排位由左至右，十分懷舊。