聽講座記

今朝去上堂，ICAC誠信培訓講座，訓練中心有這類自助販賣機，羡慕之。

通常都好少被安排上晝上堂，為左唔好遲到咁樣衰，早d出門，8:08上車，8:26到達目的地，去到戇居居等，早得滯未夠鐘拍卡簽到，嘩！越等越多人黎，原來有成村人黎上堂。

廉記公關代表鄭小姐，身穿及膝短裙對腳好粗，講野都幾流利，去到諗住會有人問幾時拉陸百狗，哈？點知都無。

檔主坐第二行側近樓梯位，方便較腳，坐我前面個阿姐攞左支hand cream出黎搽，真係唔理好醜，護膚無分種族嘅，佢真係似黎到做媒，講師一提問，佢就好好俾晒反應，十足歡樂差燒俾反應拍掌觀眾咁，一問一答令場面無咁冷清，坐佢隔離個EO響度玩手機，唔係呀嘩，坐第一行側邊都好覺眼啫！

講座有三個個案短片播出，糖妹響間場出現發下噏風。

第一段兩個主角演技太浮誇，酒樓外景竟然響屋企樓下間酒樓拍攝，幾有親切感。

第二段片太離奇，講屋邨戶主申請調遷，內容唔多講，飾演男戶主著冷衫，老婆仔女著短袖衫，究竟係乜玩法？Budget唔夠定係點？

第三段最好笑，係講差d濫用職權買演唱會飛，編劇將lady gaga 改為 lazy gaga，air supply 叫 water supply，一大笑位，演員重唱左兩句，似乎又overact 左，通常戲劇表達誇張先至令人印象深刻，ETV不嬲都係咁款架啦，講野表情有咁超現實就有咁超現實！

要讚下條片d音響效果，正宗環迴立體聲，企左邊女人出聲，右邊另一人發聲，現場一樣效果！同上次睇已經係全新故事新拍片段，廉記都幾落本喎，至少d女演員都幾養眼。

最有趣都係其中一個出席觀眾，估唔到時興著白色喱士通花底裙款嘅裙返工，十足成塊玻璃枱墊咁款， 睇到我吖！

哈！時裝野識條毛咩？

要彈就係今次講座分兩部份，第二part係人事部負責，內容多得黎太瑣碎，時間關係，心急放飯走人根本無心聽落去，培訓時間安排下午班較為可取。