檔主有個唔好嘅習慣，就係喜歡隨便擺枝牙籤落水杯度。
話說上星期六黃昏時份，沖左杯烏龍茶，當時響廳中無開燈，飲到水尾發現吞左一枝疑似「枝裝」物體，大驚，想吐出黎也沒可能。
心諗呢刻係咪吞左枝牙籤？去洗手間扣喉又唔得， 心又亂心又慌，臨開飯同老媽講。
「唔係呀嘩？」為安心起見，走去法國醫院睇夜症，廢事等公立門診。
其他屋企人去晒旅行，唯有得返孤獨大叔單拖出沒。
醫生話做電腦素描要兩皮野，袋定六千都唔夠，身上從來無信用卡，話俾住先後補都唔得，佢重話呢種情況可大可小，寫轉介信去QE睇急症。
茫茫然去到QE醒唔起自己係公務員，無啦啦俾左錢，正所謂六神合體個細佬六神無主，講乜都聽唔入耳啦，大叔！
分流到美好診所，等左幾粒鐘，靚女醫生同我照食道，睇下有無卡在喉嚨，佢問我有無唔舒服，胃痛呀，無呀！再去照X光，無所發現，由於情況特殊，被安排約左禮拜一去照胃鏡，返到屋企十點半左右，算係最有效率。
回程搭的士時遇到司機阿姐，傾開呢個鐘數好少可有車上醫院，佢話本來諗住兜個圈出尖沙咀，感恩大家遇上，得到佢嘅祝福。
後黎諗返轉頭可能係自己杯弓蛇影，醒起之前飲左菊花玫瑰茶，無洗杯再沖烏龍，飲埋先前d殘渣落肚於是疑神疑舉。
禮拜日本來無事無幹諗住第二朝取消預約，但係禮拜一臨返工果陣覺得自己飽飽滯，唔多想食野，都係去照啦，咁先至安心。
朝早去到照胃鏡部門，主診醫生已經鬧我點解會咁嘅？呢個情況分分鐘可大可少！( 又係呢句)
非常同意佢講法，心諗當檢查身體，都無壞嘅，反正身為公務員有免費醫療。
照胃鏡過程十分驚嚇，照唔到有野喎！
「事隔幾日，可能去到腸度。」
「事隔幾日，可能去到腸度。」
由於情況特別，被安排即日電腦掃瞄，等候期間抽血驗尿照肺以備萬一所需，是晚六點打尖掃瞄，再留院觀察，睇下有無出現肚痛情況，期間不準飲食，吊鹽水，整晚無覺好瞓。
可幸翌日報告沒有任何發現，順道清理腸胃，出院可也，主診醫生再三叮囑如有肚痛情況出現要萬上往急症室求診。
響度多謝A1醫護人員，陳醫生，李醫生。
